
马尔巴大师教言集MARPA40རྒྱུད་སྡེ་གཅིག་དྲིལ་གྱི་ཞུས་ལན་བཞུགས་སོ། །
2-2-1a
༄༅། །རྒྱུད་སྡེ་གཅིག་དྲིལ་གྱི་ཞུས་ལན་བཞུགས་སོ། །
༄༅། །རྒྱུད་སྡེ་གཅིག་དྲིལ་གྱི་ཞུས་ལན་བཞུགས་སོ། །
2-2-1b
༄༅། །ན་མོ་གུ་རུ། རྗེ་མར་པས་ནཱ་རོ་པ་ཆེན་པོ་ལ་གསོལ་པ། རྒྱུད་སྡེ་སོ་སོའི་མན་ངག་དེ་ལྟར་ཏེ། སྤྱིར་དྲིལ་ནས་སྒོམ་ན་ཇི་ལྟར་སྒོམ་ཞུས་པས། རྗེ་ནཱ་རོ་ཆེན་པོའི་ཞལ་ནས། ཀུན་རྫོབ་ཀྱི་བདེན་པ་སྒྱུ་ལུས་ཏེ་ཐབས། དོན་དམ་པའི་བདེན་པ་འོད་གསལ་ཏེ་ཤེས་རབ། དེ་གཉིས་ཟུང་དུ་འཇུག་པ་ནི་ཐབས་ཤེས་གཉིས་སུ་མེད་པའོ། །དེ་རྣལ་འབྱོར་པའི་རྒྱུད་ལ་སྦྱར་ན། རླུང་ནང་དུ་+ནང་དུ་+བཅུག་ནས་བསྒོམ་པས། སྣང་བ་སྒྱུ་མར་ཤེས་པས་སྒྱུ་ལུས་ཏེ་ཐབས། སྒྱུ་ལུས་འོད་གསལ་དུ་ཤེས་པས་དོན་དམ་པ་སྟེ་ཤེས་
2-2-2a
རབ། དེ་གཉིས་སུ་མེད་པ་ནི་ཟུང་འཇུག་གོ །དེ་ཇི་ལྟར་ཉམས་སུ་བླང་ན་བསྐྱེད་རིམ་མངོན་དུ་སོང་བས་ཡིག་འབྲུ་གསུམ་ལུགས་འབྱུང་། ལུགས་ཟློག་ལ་བསློབ་(སློབ་)བོ། །དེ་ནས་རླུང་ནང་དུ་བཅུག་ནས། རྩ་ཨ་བ་དྷཱུ་ཏིའི་ནང་དུ་རླུང་དང་བྱང་ཆུབ་སེམས་ལ་སྦྱངས་ཏེ་ལྟེ་བའི་ཨ་ལ་དམིགས་པ་གཏད། དེ་ནས་ལྟེ་བའི་མེ་ལ་དམིགས་པ་གཏད། དེ་ནས་ལྟེ་བའི་མེ་ལས་མེ་རླུང་གི་རང་བཞིན་རྟ་རྔ་ཙམ་འབར་བས་སྤྱི་བོའི་ཧཾ་ལ་བྱང་སེམས་བ་ཐག་ཙམ་བབས་པར་བསམ་སྟེ། དེ་ལྟར་བདེ་ལྷག་ལྷག་བསམ་པ་ཡང་ཡང་བསམ། འབྱུང་ཡང་འབྱུང་ངོ་། །དེ་ནས་འཇུག་(མཇུག་)ཏུ་དེ་གཉིས་གཅིག་ཏུ་འདྲེས་པས་ལུས་ཀྱང་དེ་ལ་ཐིམ་སྟེ། སྣང་ལ་རང་བཞིན་མེད་པའི་སྒྱུ་ལུས་སོ། །དེ་ཡང་རིམ་གྱིས་ཐིམ་སྟེ་འོད་གསལ་དུ་འཇུག་གོ །དེ་ནས་འཆི་ན་འཕོ་བ་སྐབས་དང་སྦྱར་ལ་འཕོ་སྟེ། གཞན་དུ་བླ་མའི་གདམས་ངག་གོ །དཔལ་ནཱ་རོ་པ་ཆེན་པོ་ལ་རྗེ་མར་པས་རྒྱུད་སྡེ་བཞི་གཅིག་དྲིལ་གྱི་གདམས་པ་ཞུས་པ་རྫོགས་སོ། །༄། །རྗེ་མར་པའི་ཚིགས་སུ་བཅད་པ་བརྒྱད་པ་བཞུགས་སོ། །ན་མོ་གུ་རུ། མཁས་པ་ཆེན་པོ་ནཱ་རོ་པས། །བཅུ་གཉིས་བར་དུ་བླ་མ་བསྟེན། །ཞབས་དྲུང་གདམས་པ་ནོས་པ་ནི། །
2-2-2b
སྐྱེ་ཤི་རྨི་ལམ་བར་དོ་དང་། །སྲིད་པ་བར་དོ་གསུམ་དུ་གནས། །ཉམས་བླངས་བསྲེ་འཕོ་གཉིས་སུ་འདུས། །བསྲེ་བ་སྒོམས་(བསྒོམས་)པས་སངས་རྒྱ་བ། འཕོ་བ་མ་བསྒོམས་སངས་རྒྱས་ཐབས། །སྐྱེ་ཤི་བར་དོར་སྐྱེད་རིམས་(བསྐྱེད་རིམ་)དང་། །རྩ་རླུང་རྫོགས་རིམས་(རིམ་)བསྲེས་ལ་བསྒོམ། །རྨི་ལམ་དང་པོ་རྨི་དུས་སུ། །འོད་གསལ་མན་ངག་སྒོམ་དང་བསྲེ། །རྨི་ལམ་དུས་སུ་སྒོམ་དང་བསྲེ། །ཉམས་མྱོང་གཅིག་ལ་བརྟེན་ནས་ནི། །འཆི་དུས་སྲིད་པ་བར་དོ་ཡི། །དང་པོ་མ་རིག་འོད་གསལ་འབྱུང་། །དེའི་དུས་སུ་རྩ་རླུང་དང་། །རྨི་ལམ་ཉམས་མྱོང་བརྟན་པ་ཡིས། །འོད་གསལ་བསྟིམ་པས་ཆོས་སྐུ་ཐོབ། །གཞན་པས་བར་དོ་གཉིས་པ་འབྱུང་། །མ་དག་སྒྱུ་ལུས་བསལ་བ་ལས། །དག་པའི་སྒྱུ་ལུས་ཐོབ་པའོ། །གཞན་ལས་ཐོབ་པར་མ་གྱུར་ན། །བར་དོ་གསུམ་པོ་གྲོང་འཇུག་གི །སྒོ་ནི་ཆགས་སྡང་གཉིས་ཀྱི་(ཀྱིས་)བསྐྱེད། །བསྐྱེད་རྫོགས་གཉིས་ཀྱི་ཆགས་སྡང་གིས། །སྒོ་འདི་བཅད་ལ་སངས་རྒྱས་ལ། །མི་ཐོབ་པ་ཡི་ཐེ་ཚོམ་མེད། །སངས་རྒྱས་དང་འདྲ་བླ་མ་གསུང་། །སྦྱངས་ནས་འཕོ་དང་བཙན་ཐབས་འཕོ། །ལུས་བཅོས་པ་ཡི་འཕོ་བའོ། །མ་བསྒོམས་སངས་
2-2-3a
རྒྱས་བླ་མ་གསུང་། །གདམས་ངག་ཚིགས་སུ་བཅད་པ་བརྒྱད་པ་ཞེས་བྱ་བ་རྗེ་བཙུན་ཆེན་པོ་མར་པ་ལོ་ཙ་(ཙཱ་)བས་མཛད་པ་རྫོགས་སོ། །མངྒལཾ།། །།


目录
རྒྱུད་སྡེ་གཅིག་དྲིལ་གྱི་ཞུས་ལན་བཞུགས་སོ། །